Ev şəraitində qatıq hazırlayarkən onun həm qatı, həm də balanslı dada malik olması üçün bir sıra məqamlara diqqət etmək lazımdır.
Bizim.Media xəbər verir ki, ənənəvi üsullardan biri isə mayalanan südə bir ədəd noxud əlavə edilməsidir.
Qatıq çalarkən südün temperaturu əsas amillərdən biri hesab olunur. Süd həddindən artıq isti olarsa, mayalanma prosesi düzgün getməyə bilər, temperatur aşağı olarsa isə qatıq istənilən qədər qatı alınmaya bilər.
Buna görə südün uyğun istiliyə qədər soyumasını gözləmək vacibdir. Ənənəvi üsula əsasən, mayalanacaq südə bir ədəd təmiz noxud əlavə edilir. Bu üsulun qatığın gec turşumasına və daha yaxşı qatılıq əldə etməsinə kömək etdiyi düşünülür. Lakin noxudun qatığın turşumasının qarşısını tamamilə aldığına dair elmi zəmanət yoxdur. Qatığın dadına ən çox təsir edən amillərdən biri mayalanma müddətidir.
Qatıq kifayət qədər qatılaşdıqdan sonra onu uzun müddət isti mühitdə saxlamaq turşuluğun artmasına səbəb ola bilər.
Xüsusilə isti havalarda fermentasiya daha sürətli getdiyindən prosesə nəzarət etmək lazımdır.
Bildirilir ki, digər məqam isə istifadə olunan mayanın miqdarı və keyfiyyətidir. Həddindən artıq maya əlavə etmək qatığın daha yaxşı alınacağı anlamına gəlmir. Əksinə, fermentasiyanın sürətlənməsi nəticəsində qatığın dadı daha turş ola bilər. Buna görə təzə, keyfiyyətli və çox turş olmayan təbii qatıqdan ölçülü miqdarda maya kimi istifadə etmək məsləhətdir.
Qatıq istənilən qatılığa çatdıqdan sonra onu vaxt itirmədən soyuducuya yerləşdirmək də vacibdir. Soyuq temperatur fermentasiya prosesini yavaşladaraq qatığın dadının daha da kəskinləşməsinin qarşısını almağa kömək edir. (Demokrat.az)
Bizim.Media
