Bakıda “Elmlər Akademiyası” metrosunun yaxınlığında Nəqliyyat Departamentinin əməkdaşları ilə 6 saylı avtobusun sürücüsü arasında insident yaranıb. Hadisə yerində olan Moderator.az əməkdaşının verdiyi məlumata görə, insidentə səbəb 6 saylı avtobusun dayanacaqda müəyyən olunmuş vaxtdan çox dayanması olub:
“Bunu əsas gətirən departament işçiləri avtobusun açarlarını sürücünün əlindən alıblar. Bunun ardınca avtobusdakı sərnişinlər də endirilib. Departament əməkdaşlarının bu addımı sürücünün narazılığına səbəb olsa da, departament işçiləri açarları avtobus sürücüsünə verməkdən imtina ediblər. Mənzilbaşına çata bilməyən sərnişinlər isə öz yollarına davam etmək üçün növbəti avtobusu gözləməli olub”.
Xatırladaq ki, son vaxtlar avtobus sürücüləri ilə Nəqliyyat Departamentinin əməkdaşları arasında bu cür insidentlər ənənə halını alıb. Bu kimi insidentlərdən ən çox əziyyət çəkən isə yarı yolda düşmək məcburiyyətində qalan sərnişinlərdir.
