Sumqayıt
şəhərinin Corat qəsəbəsində uzun illərdir ki, mövcud olan kanalizasiya
probleminin əsaslı şəkildə həll edilməməsi, qəsəbə sakinlərinin bələdiyyə ilə
bağlı narazılığını daha da artırıb.
Bu
barədə Moderator.az-a
məlumat verən özəl mənbənin sözlərinə görə, bələdiyyə yüzlərlə insanı narahat
edən problemin həlli istiqamətində nəinki heç bir addım atmır, hətta buna səy
belə göstərmir:
“Corat
qəsəbəsinin yeni salınmış məhəllələrində kanalizasiya problemi bir neçə ildir
ki, mövcud olsa da, problem hələ də həll edilmiş deyil. Bununla bağlı həm
Sumqayıt Şəhər İcra Hakimiyyəti, həm də Corat bələdiyyəsinə çoxsaylı
müraciətlər ünvanlansa da, adıçəkilən qurumların heç biri problemin aradan
qaldırılmasını təmin etməyib. Nəticədə, mənzillərdən axan kanalizasiya suları
böyük bir ərazini çirkləndirməklə yanaşı, sanitariya baxımından da fəlakətli
mənzərə yaradıb. Vətəndaşların bildirdiyinə görə, Corat qəsəbəsi 2010-cu ildə
Ekologiya və Təbii Sərvətlər Nazirliyi tərəfindən yarıtmaz fəaliyyətinə görə 7
min manat məbləğində cərimələnsə də, bu gün də öz fəaliyyətində müsbət mənada
hansısa dönüşə nail olmuş deyil. Bu səbəbdən də sakinlər problemin həlli üçün
Prezident Administrasiyasına müraciət etməyi qərara alıb. Onların fikrincə, artıq
Corat bələdiyyəsinin yardımına ümid bağlamaq əbəs yerə vaxt itirməkdən başqa
bir şey deyil”.
