Qaraməryəm-İsmayıllı-Şəki magistiral yolunun Oğuz rayonunun Calut kəndi ərazisindən keçən hissəsində hərəkətdə olan avtomobilin mühərrikində yanğın baş verib.
Bizim.Media-nın yerli bürosu xəbər verir ki, hazırda Oğuzda müvəqqəti məskunlaşan əslən Laçın rayonundan olan Ceyhun Vəliyev idarə etdiyi “Opel” markalı, 99-RZ-025 dövlət nömrə nişanlı minik avtomobili hərəkətdəykən yanğın baş verib.
Yoldan keçənlər ilkin müdaxilə edib. Həmçinin hadisə yerinə Fövqəladə Hallar Nazirliyinin Oğuz rayon Dövlət Yanğından Mühafizə Hissəsinin texnikası və şəxsi heyəti cəlb olunub.
Yanğın nəticəsində avtomobilin mühərrik hissəsinin yanar konstruksiyaları yanıb. Xoşbəxtlikdən yanğın söndürülən zaman xəsarət alan olmayıb.
Faktla bağlı müvafiq qurumlar tərəfindən araşdırma aparılır.
Tural Rasim oğlu, Bizim.Media, Şimal-Qərb bürosu
