İndiki şəraitdə müxalifətt qüvvələrinin keçirəcəyi aksiyaların effektliyi barədə nəsə demək çətindir.
Bunu Moderator.az-a açıqlamasında Azad Demokratlar Partiyasının sədri Sülhəddin Əkbər deyib.
Onun sözlərinə görə, bu gün siyasi aksiyaların keçirilməsi və onun effektivliyi ilə bağlı məsələyə ancaq ona qərar verən qüvvələr tərəfdən daha dəqiq cavab verilə bilər:
“Kütləvi aksiyaların keçirilməsi ilə bağlı qərar verən siyasi qüvvə ölkədəki ictimia-siyasi durumu təhlil edib, nəticə çıxardıqdan sonra bu addımı atır. Bu baxımdan mən bu aksiya haqqında uzaqgörən fikir bildirmək niyyətində deyiləm. Amma bununla belə cəmiyyətdəki əhval-ruhiyəyə, eyni zamanda yaranmış durum kütləvi etiraz tədbirlərinin keçirilməsini tələb edir. Xüsusən də insan haqları, demokratiya sahəsində yaranmış vəziyyət bunu vacib edən amillərdəndir. Digər tərəfdən də xalqın laqeydliyi sosial tələbatın olmadığını göstərir. Bu baxımdan düşünürəm ki, aksiyaların keçirilməsi lazımdır, amma bu nə dərəcədə effekt verib-verməyəcək, bax, bu məsələdə şübhəliyəm.”
Cəmiyyətin sosial problemlərin məngənəsində boğulduğu, bir yandan da insan haqlarının, demokratik durumun məhdudlaşdırıldığı bir məqamda yaranmış duruma adekvat reaksiya verə bilməməsinin səbəbinə gəldikdə isə S. Əkbər bildirdi ki, bunun başlıca səbəbi Azərbaycan xalqının sovet dövründə olduğu kimi siyasətdən uzqlaşdırılmasıdir:
“Bu cür sonluq cəmiyyətdə laqeydliyin dərin kök salmasıdır. Bu gün parodoksal bir vəziyyət yaranıb. Bir tərəfdən vəziyyət günü-gündən çətinləşir, narazılıq artır, digər tərəfdən də buna paralel olaraq laqeydlik də güclənir. Nəticədə cəmiyyət yaranmış duruma adekvat reaksiya verə bilmir. Digər əsas başlıca səbəblərdən biri də Azərbaycan müxalifətinin xalqdan ayrılması, xalqı təşkil edib müətşəkkil qüvvəyə çevirib arxasınca apara bilməməsidir. Yəni narazı qüvvələrin mütəşəkkil etirazını təşkil edə bilməməsidir. Daha bir amil isə hakimiyyətin apardığı repressiv siyasətdir ki, müxalifət və cəmiyyət də bundan qorxur. Necə deyərlər, Azərbaycan cəmiyyəti bu gün sovet dövründə olduğu kimi idarə olunur.”
