ABŞ-da körpə nadir əməliyyatla iki dəfə “dünyaya gətirildi” – FOTO

ABŞ-ın Florida ştatında dünyaya gələn körpə nadir və mürəkkəb əməliyyat sayəsində xilas edilib.

Bizim.Media xəbər verir ki, hamiləliyin 19-cu həftəsində həkimlər döldə yüksək tənəffüs yollarının obstruksiyası sindromu aşkarlayıblar.

Bu, çox nadir rast gəlinən haldır. Belə vəziyyətdə xüsusi membran körpənin tənəffüs yollarını bağlayır və doğuşdan sonra nəfəs almasını mümkünsüz edə bilər.

Həkim Emanuel Vlastos bildirib ki, 42 illik karyerası ərzində bu cür hallarla yalnız bir neçə dəfə qarşılaşıb və onlardan çox azı uğurla nəticələnib.
 

Əvvəlcə ana bətnində lazer əməliyyatı aparmağa cəhd edilsə də, bu müdaxilə nəticə verməyib.Bundan sonra həkimlər daha riskli və nadir üsula əl atıblar. Hamiləliyin 25-ci həftəsində qadına qismən qeysəriyyə əməliyyatı edilib: körpənin başı və qolları ana bətnindən çıxarılıb, lakin bədəni plasenta ilə bağlı saxlanılıb.

Bu zaman LOR-cərrah dərhal körpənin tənəffüs yollarını açıb. Daha sonra körpə yenidən ana bətninə qaytarılıb və hamiləlik davam etdirilib.

Prosedurdan altı həftə sonra uşaq tam olaraq dünyaya gəlib.

Həkimlər bildirirlər ki, körpənin həyatda qalması nadir tibbi uğur kimi qiymətləndirilir.