Bu smartfon 32 saat fasiləsiz video yayımladı - “Ginnesin Rekordlar Kitabı”na düşdü

Vivo şirkətinin təqdim etdiyi Y600 smartfonu 10 000 mAh tutumlu batareyası sayəsində “Ginnesin Rekordlar Kitabı”na düşüb.

Bizim.Media xəbər verir ki, cihaz sınaq zamanı 32 saat 37 dəqiqə fasiləsiz video yayımlayaraq rekord müəyyənləşdirib.

Ginnesin Rekordlar Kitabına smartfonun batareya ömrünün sınağının canlı yayımının ən uzun müddət davam etməsi kateqoriyasında daxil edildiyi bildirilir.

Vivo Y600 44 Vt gücündə naqilli enerji doldurma və digər elektron cihazları enerji ilə təmin etməyə imkan verən əks enerji doldurma funksiyalarını dəstəkləyir.
 

Smartfon 120 Hz tezlikli, 1,5K təsvir ölçülü AMOLED ekran, Dimensity 7300e prosessoru, 8 GB-dək operativ yaddaş və 256 GB-dək daxili yaddaşla təchiz olunub. Əsas arxa kamera 50 meqapiksellik, ön kamera isə 8 meqapiksellikdir. Cihazda həmçinin ekranaltı optik barmaq izi skaneri, NFC, Bluetooth 5.4 və 5G dəstəyi var.

Smartfon artıq Çində ilkin sifariş üçün əlçatandır. 6 GB operativ və 128 GB daxili yaddaşa malik versiya 300 dollara, 8 GB operativ və 256 GB daxili yaddaşa malik model isə 370 dollara təklif olunur. Vivo Y600-ün qlobal bazarlarda satışa çıxarılıb-çıxarılmayacağı hələ təsdiqlənməyib.

Bizim.Media