Millimizin keçmiş üzvü iki klubla danışıqlar aparır – ÖZƏL

Ötən mövsümü “Neftçi”də keçirən Höccət Haqverdi komandadan ayrılıb.

Bizim.Media-nın əldə etdiyi məlumata görə, iranlı futbolçunun ölkəmizi tərk edəcəyi gözlənilsə də, bu baş verməyib.

Çünki mərkəz müdafiəçisinə yerli klublar maraq göstərir.

Bunlardan biri Höccətin keçmiş klubu “Sumqayıt”dır. Futbolçunu yaxından tanıyan və onu Azərbaycana gətirən “Sumqayıt”ın prezidenti Riad Rəfiyev müdafiəçini yenidən “kimyaçılar”ın heyətinə cəlb etmək istəyir.

Höccət Haqverdini transfer etmək istəyən digər klub isə “İmişli”dir. Premyer Liqanın debütantı müdafiə xəttini gücləndirmək üçün təcrübəli futbolçuya ehtiyac duyur. Hazırda hər iki klubla danışıqları davam etdirən təcrübəli futbolçu yaxın günlərdə qərarını açıqlayacaq.

Qeyd edək ki, ölkəmizə 2021-ci ildə gələn Höccət Haqverdi “Sumqayıt” və “Neftçi”də çıxış edib. O, bir müddət Təbrizin “Traktor” klubunda icarədə olub.

Rəşad Rafiqoğlu, Bizim.Media