“Avroviziya-2027” mahnı müsabiqəsinin iştirakçılarına tələblər sərtləşdirildi

Avropa Yayım Birliyi (EBU) “Avroviziya” mahnı müsabiqəsinin 2027-ci ildən qüvvəyə minəcək yeni qaydalarını təsdiqləyib.

Bizim.Media xəbər verir ki, dəyişikliklər iştirakçıların minimum yaş həddinə, fonoqramlardan istifadəyə və təhlükəsizlik şəraitində müsabiqənin təşkilinə aiddir.

Yeni qaydalara əsasən, 2027-ci ildən etibarən ifaçıların ilk məşq zamanı yaşı ən azı 18 olmalıdır. Əvvəllər bu hədd 16 yaş idi. EBU qərarı gənc ifaçıların müdafiəsinin gücləndirilməsi və onların beynəlxalq müsabiqə ilə bağlı təzyiqlərdən qorunması zərurəti ilə izah edib.

Bundan əlavə, mahnının əsas melodiyası aparıcı ifaçı və ya ifaçılar tərəfindən canlı səsləndirilməlidir. Fonoqramlardan və əvvəlcədən yazılmış audioelementlərdən istifadəyə icazə verilsə də, onlar canlı vokalı əvəz etməməli və həddindən artıq dəstəkləməməlidir.

Yeni qaydalara görə, silahlı münaqişə, mürəkkəb geosiyasi vəziyyət və ya digər hallar qalib ölkənin və ya qonşu regionun təhlükəsizliyinə və sabitliyinə ciddi təsir göstərərsə, həmin ölkə növbəti müsabiqəyə ev sahibliyi etmək hüququnu itirə bilər. Bu halda EBU alternativ təşkilatçı yayımçı təyin edə biləcək.

“Avroviziya”nın direktoru Martin Qrin bildirib ki, dəyişikliklər müsabiqənin şəffaflığını artırmaq, ifaçıları qorumaq və bütün iştirakçılar üçün təhlükəsiz mühit yaratmaq məqsədi daşıyır.

Qeyd edək ki, 71-ci “Avroviziya” mahnı müsabiqəsi 2027-ci il mayın 11 və 13-də yarımfinalları, mayın 15-də isə böyük finalı olmaqla Bolqarıstanın Burqas şəhərində keçiriləcək.

Bizim.Media