Katolik keşişlər TikTok-da bloqerliyə başladılar

Latın Amerikasında kilsələrə ziyarətlərin azalması və dini kimliyin zəifləməsi katolik ruhaniləri, rahibələri və diakonları sosial şəbəkələrə üz tutmağa vadar edib. Onlar xüsusilə TikTok platformasından təbliğat, gənclərlə ünsiyyət və dini fikirlərin yayılması üçün istifadə edirlər.

Bizim.Media xəbər verir ki, bu barədə “Reuters” məlumat yayıb.
 

Hazırda Latın Amerikası ölkələrində katolik ruhanilər gənc nəsli kilsəyə cəlb etmək məqsədilə TikTok və digər sosial şəbəkələrdə fəallıqlarını artırıblar. Onlar internetdə qısa moizələr, maarifləndirici videolar, hətta yumoristik məzmunlar paylaşırlar.

Rəqəmsal dini təbliğatın genişlənməsi regionda kilsələrə ziyarətlərin azalması və dini kimliyin zəifləməsi ilə əlaqələndirilir. Bununla belə, Latın Amerikası dünyada katolik əhalinin sayına görə ən böyük region olaraq qalır.

Vatikan sosial şəbəkələri dini inancların yayılması üçün yeni məkan kimi qiymətləndirir. Bu proses xüsusilə COVID-19 pandemiyası dövründə sürətlənib. Həmin vaxt bir çox dini mərasim və moizələr internetə daşınıb.

Bizim.Media