Ukrayna ordusu bir neçə istiqamətdə əks-hücuma keçdi

Ukrayna Müdafiə Qüvvələrinin əks-hücumları Rusiya ordusunun cəbhədə irəliləməsini çətinləşdirir. Ukrayna hərbçiləri Xarkov, Donetsk və Zaporojye vilayətlərində bir neçə istiqamətdə əks-hücum əməliyyatları həyata keçiriblər.

Bizim.Media xəbər verir ki, bu barədə Müharibənin Öyrənilməsi İnstitutunun (ISW) noyabrın 8-nə dair hesabatında bildirilib.

Hesabata görə, Rusiya qoşunları noyabrın 7-8-də Sumı vilayətinin şimalında hücum əməliyyatlarını davam etdirsələr də, irəliləyə bilməyiblər. Kupyansk istiqamətində də vəziyyət dəyişməyib.

Borovaya yaşayış məntəqəsinin şimal-şərqində Rusiya qüvvələrinin hücumlarına qarşı Ukrayna hərbçiləri əks-hücum həyata keçiriblər.

Analitiklərin məlumatına görə, Rusiya qoşunları noyabrın 7-8-də Liman şəhəri yaxınlığında və Oskol çayı boyunca hücumlarını davam etdirsələr də, irəliləyiş əldə edə bilməyiblər. Ukrayna Müdafiə Qüvvələri Balki Juravki yaxınlığında əks-hücuma keçib.

ISW həmçinin Rusiyanın Dibrova yaşayış məntəqəsinin mərkəzini ələ keçirməsi ilə bağlı iddialarını təkzib edib. Hesabatda qeyd olunur ki, Ukrayna pilotsuz uçuş aparatlarının fəaliyyəti həmin ərazidə gizlənən Rusiya hərbçilərinin hərəkətini məhdudlaşdırır.

Zaporojye vilayətinin qərbində də Rusiya ordusunun hücumları nəticəsiz qalıb. Ukrayna qüvvələri Orexov şəhərinin cənub-şərqində əks-hücum əməliyyatları keçiriblər.

Bununla yanaşı, analitiklər Rusiya qoşunlarının Dobropolyenin cənubunda və cənub-qərbində müəyyən irəliləyiş əldə etdiyini və ya həmin ərazilərə sızdığını bildirirlər.

Hesabatda qeyd olunur ki, Rusiya hərbçiləri, ehtimal ki, əvvəllər Krasnopolye və Dobropolyenin cənub hissəsinə doğru irəliləyərək cənub-qərbdəki mövqelərinə çatmağa nail olublar. Ukrayna hərbi mənbəsinin məlumatına görə, Dobropolyenin cənub-qərbində yerləşən Nadejda kəndində Rusiya və Ukrayna qüvvələri arasında döyüşlər gedir. Bu isə Rusiya hərbçilərinin həmin əraziyə sızmış ola biləcəyini göstərir.

Bizim.Media