“Apple” şirkəti süni intellektin inkişafı və İİ-agentlərin “Mac” kompüterlərinə inteqrasiyası ilə bağlı potensial təhlükəsizlik riskləri barədə xəbərdarlıq edib.
Bizim.Media xəbər verir ki, bu barədə “MacRumors” məlumat yayıb.
Şirkətin məlumatına görə, bəzi tətbiqlər istifadəçilərin gözləmədiyi şəkildə “tam diskə giriş” funksiyasından yararlanır. Bu isə məxfi məlumatların genişmiqyaslı sızması riskini yaradır.
Potensial təhlükə altında sistem faylları, elektron poçtlar, şəxsi mesajlar və brauzer tarixçəsi ola bilər. İstifadəçilər isə proqramlara verdikləri rəqəmsal icazələrin miqyasını hər zaman tam dərk etmirlər.
Məlumata görə, xüsusilə rabitə və mesajlaşma tətbiqləri narahatlıq doğurur. Belə proqramların geniş giriş imkanları təkcə cihaz sahibinin deyil, onun yazışdığı şəxslərin də məxfiliyini təhlükə altına sala bilər.
Məsələni daha da ciddi edən amillərdən biri müasir süni intellekt sistemlərinin getdikcə daha müstəqil fəaliyyət göstərməsidir.
“Apple” yaranan təhlükələrə cavab olaraq əlavə nəzarət mexanizmlərinin tətbiq ediləcəyini açıqlayıb. Yeni alətlərin genişləndirilmiş icazələrin yalnız istifadəçinin şüurlu razılığı əsasında verilməsini təmin etməsi nəzərdə tutulur.
Şirkət nümayəndələri vurğulayıblar ki, avtonom sistemlər inkişaf etdikcə potensial təhlükələrin səviyyəsi də arta bilər. Buna görə proqramların əldə etdiyi hüquqlara daha ciddi nəzarət edilməlidir.
Bizim.Media
