Rusiya ABŞ-da gizli onlayn dezinformasiya kampaniyası aparır. Məqsəd amerikalıların noyabr ayında keçiriləcək Konqres seçkilərinə etimadını sarsıtmaq və ölkə daxilində siyasi fikir ayrılıqlarını daha da dərinləşdirməkdir.
Bizim.Media xəbər verir ki, bu barədə kəşfiyyat qiymətləndirmələri ilə tanış olan ABŞ rəsmiləri “The New York Times”a bildiriblər.
Onların sözlərinə görə, son aylarda ABŞ xüsusi xidmət orqanları Kremlin “Amerika auditoriyasına yönəlmiş növbəti təsir əməliyyatına icazə verdiyini” müəyyən edib.
İddiaya görə, sosial şəbəkələr vasitəsilə artıq mövcud olan siyasi ziddiyyətləri daha da gücləndirməyə və seçki kampaniyası ətrafında xaos təsəvvürü yaratmağa yönəlmiş məzmun yayılır.
Bununla yanaşı, kəşfiyyat qiymətləndirmələri Rusiyanın seçki infrastrukturunun işinə birbaşa müdaxilə etməyə və ya səslərin hesablanması prosesini dəyişdirməyə çalışdığına dair əlamətlər aşkar etməyib. Məxfi məlumatları müzakirə etmək səlahiyyəti olmadığı üçün anonim danışan rəsmilər əməliyyatın konkret detallarını açıqlamayıblar.
Rusiya dezinformasiyası üzrə ekspertlər isə son həftələrdə sosial şəbəkələrdə süni intellektdən istifadə edilən kampaniyalar aşkarlayıblar. Xüsusilə məşhur Hollivud aktyorlarının və digər tanınmış şəxslərin Senat seçkiləri ilə bağlı əsas məsələlər barədə fikir bildirdiklərini göstərən saxta videolar yayılıb.
Bəzi ABŞ rəsmilərinin qiymətləndirməsinə görə, hazırkı Rusiya əməliyyatı Moskvanın ən azı bəzi əvvəlki kampaniyaları ilə müqayisədə daha kiçikmiqyaslı və daha az koordinasiyalı görünür. ABŞ kəşfiyyatının əvvəllər məxfiliyi götürülmüş qiymətləndirmələrinə görə, Rusiya 2016-cı ildən etibarən federal səviyyədə keçirilən hər seçki dövründə internet üzərindən təsir əməliyyatları həyata keçirib.
Rəsmilərin sözlərinə görə, hazırkı kampaniyanın əsas məqsədi hansısa konkret partiyanı dəstəkləmək deyil, xaosu və siyasi qütbləşməni gücləndirmək ola bilər.
Bununla belə, son həftələrdə aşkarlanan kampaniyaları Rusiya ilə əlaqələndirən müstəqil tədqiqatçılar bildirirlər ki, həmin məzmun indiyədək yalnız Senat uğrunda mübarizənin xüsusilə gərgin olduğu ştatlarda Demokrat namizədlərə qarşı yönəlib.
ABŞ xüsusi xidmət orqanları İran və Çinin mümkün müdaxiləsini də qiymətləndirirlər. Rəsmilərin sözlərinə görə, Tehran seçkilərə təsir göstərməyə cəhd edə bilər, lakin hazırda İranla əlaqələndirilən təsdiqlənmiş fəaliyyət azdır. İran daha əvvəl, xüsusilə 2020 və 2024-cü illərdə keçirilən prezident seçkiləri zamanı Donald Trampa qarşı yönəlmiş kampaniyalar aparıb.
Avqust ayında “Meta” ABŞ siyasətinə fokuslanan və İranla əlaqəli olan kiçik hesablar şəbəkəsini “Facebook” və “Instagram”da aşkarladığını açıqlayıb. Şəbəkənin materiallarının bir hissəsi süni intellektin köməyi ilə hazırlanıb və şirkətin qiymətləndirməsinə görə, respublikaçılara qarşı mesajlar ehtiva edib.
ABŞ kəşfiyyatının qiymətləndirmələrinə görə, Çin də Konqresə ayrı-ayrı seçkilərə təsir göstərməyə və ya Pekinin öz maraqlarına qarşı çıxan konkret qanunvericilərə qarşı fəaliyyət göstərməyə cəhd edə bilər. Bununla belə, ABŞ rəsmiləri hesab edirlər ki, Çin mümkün cavab tədbirlərindən ehtiyat edərək belə addımlardan imtina edə bilər.
Hazırkı qiymətləndirmələr aralıq seçkilərinin təhlükəsizliyinə diqqətin artdığı bir vaxtda açıqlanıb.
“Reuters” daha əvvəl xəbər vermişdi ki, ABŞ seçki rəsmiləri infrastruktura mühafizəni gücləndirir, həmçinin Rusiya, Çin və İrandan mümkün dezinformasiya və müdaxiləyə qarşı mübarizəyə hazırlaşırlar.
2016-cı ildə ABŞ kəşfiyyatı belə qənaətə gəlmişdi ki, Rusiya prezidenti Vladimir Putin Demokratlar Partiyasının namizədi Hillari Klintonu nüfuzdan salmağa və Donald Trampı dəstəkləməyə yönəlmiş genişmiqyaslı seçki müdaxiləsi kampaniyasına göstəriş verib. Bu nəticələr sonradan bir neçə araşdırma, o cümlədən Senatın Kəşfiyyat Komitəsinin uzunmüddətli araşdırması ilə təsdiqlənib.
Bizim.Media
