Lüks moda dünyasında qiymətlərin daim artması və eksklüzivliyin qorunması əsas prinsiplərdən sayılır. Lakin Gucci-nin sahibi olan Kering şirkətinin yeni strategiyası bu yanaşmanı dəyişir.
Bizim.Media xəbər verir ki, Kering-in rəhbəri Luka de Meonun həyata keçirdiyi tədbirlər çərçivəsində şirkət səmərəsiz mağazaları bağlayıb, xərcləri azaldıb və kosmetika aktivlərini 4 milyard avroya L’Oréal-a satıb.
Ən diqqətçəkən addım isə bəzi Gucci məhsullarının qiymətlərinin aşağı salınması olub.
Bernstein analitiklərinin hesablamalarına görə, may ayının əvvəlində məşhur Mercato Tote Bag çantasının qiyməti 20-25 faiz azaldılıb.
Lüks sənayesində bu addım qeyri-adi hesab olunur. Çünki qiymətlərin aşağı salınmasının brendin nüfuzuna zərər vura biləcəyi düşünülür. Buna baxmayaraq, qiymət endirimləri zəifləyən bazarda satışların azalmasını yavaşlatmağa və şirkətin gəlirliliyini artırmağa kömək edib.
Kering-in strategiyası həmçinin daha geniş müştəri kütləsinə yönəlmək məqsədi daşıyır. Son dövrlərdə bahalı lüks məhsulların qiymətlərinin sürətlə artması orta gəlirli alıcıların bir hissəsini bazardan uzaqlaşdırıb.
Şirkət daha münasib qiymətlərlə yeni müştərilər cəlb etməklə “əlçatan lüks” tendensiyasından yararlanmağa çalışır. Bu yanaşma Gucci-yə rəqiblərindən fərqli olaraq, zəifləyən bazarda müştəri itkilərini məhdudlaşdırmağa imkan verir.
Bizim.Media
