Peruda devrilmiş dövlət başçısının qızı prezident SEÇİLDİ

Peruda keçirilən prezident seçkilərində sağçı "Xalqın gücü" partiyasının namizədi Keyko Fuximori qalib gəlib. Bu barədə məlumatı iyunun 30-da ölkənin Milli Seçki Prosesləri İdarəsi (ONPE) açıqlayıb.

Bizim.Media xəbər verir ki, rəsmi qurumun bülletenlərin 100%-ni emal etdikdən sonra yaydığı məlumata görə, Fuximori 9 223 396 vətəndaşın dəstəyini qazanaraq ümumi səslərin 50,135%-ni əldə edib.

Onun əsas rəqibi, "Birlikdə Peru naminə" siyasi təşkilatını təmsil edən Roberto Sançes isə 49,865% səs toplayıb. Sançes üçün 9 173 755 seçici səs verib.

Bu qələbə ilə Fuximori ölkə tarixində demokratik seçkilər vasitəsilə ali dövlət postuna seçilən ilk qadın prezident olub.

Qeyd edək ki, 2022-ci ildə Peruda prezident vəzifəsini Dina Boluarte tutsa da, o, bu səlahiyyətləri parlamentin əvvəlki dövlət başçısı Pedro Kastilyonu qanunverici orqanı buraxmaq cəhdinə görə hakimiyyətdən uzaqlaşdırmasından sonra almışdı. Fuximori isə birbaşa xalqın səsverməsi ilə bu titula sahib çıxan ilk qadın kimi tarixə düşüb.

Xatırladaq ki, yeni prezidentin atası Alberto Fuximori 1990-cı ildən 2000-ci ilə qədər Perunun prezidenti vəzifəsində çalışıb. Fuximori ölkədə fəaliyyət göstərən Maoist və Marksist-Leninist qruplarına qarşı silahlı mübarizə aparıb. 2000-ci ildə partiyası daxilində korrupsiya sübutları aşkar edildikdən sonra Fuximori ölkədən qaçıb və parlament tərəfindən hakimiyyətdən uzaqlaşdırılıb. 

Bizim.Media