QAT Cümhuriyyət abidəsini ziyarət etdi -FOTOLAR

Qarabağ Azadlıq Təşkilatının (QAT) üzvləri bu gün Cümhuriyyət abidəsini ziyarət ediblər. QAT üzvləri saat 11:00 radələrində “İçərişəhər” metrostansiyasının qarşısına toplaşıblar. Polis rəhbərliyi QAT üzvlərinə yaxınlaşaraq kütləvi ziyarətə icazə verilmədiyini bildiriblər, bu xəbərdarlığa baxmayaraq QAT üzvləri abidəyə doğru irəliləyiblər, polislərlə sərt qarşıdurma yaranıb, polis əməkdaşları kənara çəkilməli olublar. QAT üzvləri yürüşlə abidəyə doğru gediblər, “Yaşasın Azərbaycan Xalq Cümhuriyyəti!”, “Qarabağ!”, “Ya Qarabağ, ya ölüm!”, “Şanlı Azərbaycan!” və digər şüarları səsləndirib, dövlət himnini oxuyublar. Abidənin qarşısına gül dəstələri qoyulub, sonra QAT sədri Akif Nağı və digərləri çıxış ediblər. Akif Nağı Azərbaycan Xalq Cümhuriyyətinin tarixi yeri, M.Ə.Rəsulzadə, Ə.M.Topçubaşov, N.B.Yusifbəyli, F.X.Xoylu, Ə.B.Ağaoğlu, B.X.Cavanşir, X.B.Sultanov və digər böyük şəxsiyyətlərin xidmətlərindən danışıb və xüsusi olaraq vurğulayıb: “Azərbaycanın ərazi bütövlüyü Cümhuriyyət dövrünün sərhədlərində bərpa olunmalı, torpaqlarımız son qarışına qədər işğaldan azad olunmalıdır. İnanırıq ki, o gün uzaqda deyil.”