Paşinyandan Ərdoğanın Qarabağla bağlı təklifinə REAKSİYA

Ermənistanın baş naziri Nikol Paşinyan Türkiyə prezidenti Rəcəb Tayyib Ərdoğanın Qarabağla bağlı dördtərəfli görüş keçirmək təklifinə münasibət bildirib.

Bizim.Media “Sputnik Ermənistan” nəşrinə istinadən xəbər verir ki, İrəvan Ağsaqqallar Şurasına seçkilərdə səsvermədən sonra jurnalistlərlə söhbətində Paşinyan qeyd edib ki, müxtəlif təkliflər daxil olur.

"Bu, yeganə ideya deyil və mən təkcə onu vurğulamaq istəmirəm. Bunu bütövlükdə nəzərdən keçirmək lazımdır", - Paşinyan bildirib.

Bundan əvvəl Türkiyə prezidenti Rəcəb Tayyib Ərdoğan Rusiya, Azərbaycan və Ermənistan liderlərinə Türkiyə və Rusiyanın iştirakı ilə Qarabağla bağlı dördtərəfli görüşün keçirilməsini təklif etdiyini bildirib.
Xatırladaq ki, sentyabrın 11-də Ermənistanın baş naziri Nikol Paşinyanla Türkiyə prezidenti Rəcəb Tayyib Ərdoğan arasında telefon danışığı olub. Ermənistan və Türkiyə liderləri ikitərəfli münasibətləri və regional məsələləri müzakirə ediblər.

Söhbət zamanı qeyd olunub ki, regionda uzunmüddətli sülh və sabitlik bütün region ölkələrinin inkişafına və çiçəklənməsinə töhfə verəcək. Tərəflər bu istiqamətdə diplomatik səyləri davam etdirəcəklərini qeyd ediblər.

Bizim.Media