Göygöl-Kəlbəcər yolunun tikintisi Türkiyə şirkətinə veriləcək - RƏSMİ

“Göygöldən Kəlbəcərə yol var. Toğanalı kəndindən başlayaraq Murovdağ silsiləsindən keçməklə Kəlbəcər-İstisu, Kəlbəcər-Laçın istiqamətində yolun inşasında ilkin işlərə başlanılıb”.

Bu sözləri Bizim.Media-ya açıqlamasında Azərbaycan Avtomobil Yolları Dövlət Agentliyinin İctimaiyyətlə əlaqələr şöbəsinin rəisi Anar Nəcəfli səsləndirdi: 

MÖVZU İLƏ BAĞLI:

İşğaldan azad edilmiş ərazilərdə torpaq islahatları aparılacaq 

“Murovdağ silsiləsinə kimi ilk 16 kilometrlik torpaq işləri həyata keçirilib. Hal hazırda həmin yolun tikintisi layihələndirmə mərhələsindədir. 2-3 hərəkət zolaqlı olması nəzərdə tutulub. 3 hərəkət zolağı enişli-yoxuşlu ərazilərdə, digər yerlərdə 2 hərəkət zolaqlı 2-ci texniki dərəcəli avtomobil yolu olacaq. 

"Murovdağ silsiləsi 3 min 500 metr hündürlüyə malikdir. Çətin relyef olduğuna görə, dağ silsiləsini tunellər vasitəsilə keçmək planlaşdırılır. Tunellərin uzunluğu 10-12 kilometr olacaq. Layihə üzrə dəqiqləşirmə aparılacaq”.

Anar Nəcəfli bildirdi ki, layihəyə Türkiyə şirkətlərinin cəlb olunması hədəflənib, hazırda danışıqlar aparılır və yaxın günlərdə bununla bağlı açıqlama veriləcək. AAYDA-nın şöbə rəisi əlavə etdi ki, proyektin uzunluğu 190 km-dir. 

“Layihə şimal ərazisindən nəqliyyat vasitələrinin Qarabağa daxil olmasını təmin edəcək. 

Mincivan-Ermənistan sərhədinin magistral yolunun həmin hissəsinin yenidən qurulması və həmin yoldan Qubadlı-Laçın istiqamətində 2-ci texniki dərəcəli yolun tikintisi də nəzərdə tutulub.

Bununla da, Füzuli-Şuşa yolundan əlavə həm şimal, həm də cənubdan Laçın istiqamətində hərəkət etmək mümkün olacaq”.

AAYDA rəsmisinin fikrincə, planlaşdırılan yollar regionun inkişafı baxımından mühüm əhəmiyyətə malikdir. 

Anar Rəhimov, Bizim.Media