Si Cinpin Ukrayna ilə bağlı ABŞ və Rusiya arasında üçtərəfli görüşün əleyhinədir - Ştaynmayer

Çin Ukraynadakı müharibənin başa çatdırılması yollarını müzakirə etmək üçün ABŞ və Rusiyanın iştirakı ilə üçtərəfli sammitdə maraqlı deyil.

Bizim.Media xəbər verir ki, bunu Almaniya Prezidenti Frank-Valter Ştaynmayer Pekində Çin lideri Si Cinpinlə görüşündən sonra Almaniya televiziyasına müsahibəsində bildirib.
 

Ştaynmayerin sözlərinə görə, ABŞ Prezidenti Donald Tramp, Rusiya Prezidenti Vladimir Putin və Si Cinpinin noyabrın 18-19-da Şençjendə keçiriləcək Asiya-Sakit Okean İqtisadi Əməkdaşlıq Təşkilatının (APEC) sammitində görüşməsi ehtimalı olsa da, Ukrayna məsələsi gündəliyə daxil edilməyəcək.

Almaniya prezidenti bildirib ki, Si Cinpin Ukraynadakı münaqişənin Avropa münaqişəsi olduğunu və onun həllində avropalıların da iştirak etməli olduğunu vurğulayıb. Ştaynmayer üçtərəfli sammitin keçirilməsi ehtimalını gündəmə gətirəndə Çin liderinin təəccübləndiyini də qeyd edib.

Bununla da Ştaynmayer Çin, Rusiya və ABŞ arasında Ukrayna ilə bağlı mümkün danışıqlar barədə mediada yayılan məlumatları təkzib edib.

Bizim.Media