Pakistan və Ermənistan arasında diplomatik əlaqələr quruldu

Pakistan və Ermənistan xarici işlər nazirləri Tianjin şəhərində rəsmi birgə bəyanat imzalayaraq iki ölkə arasında diplomatik münasibətlərin qurulduğunu elan ediblər.

Bizim.Media xəbər verir ki, bəyanatda tərəflər qarşılıqlı anlaşma və əməkdaşlığın inkişaf etdirilməsi istiqamətində niyyətlərini ifadə ediblər.

Bununla belə, regional kontekstdə diqqət çəkən məqam Pakistanın uzun illər Azərbaycanın tarixi torpaqları olan Qarabağın işğalına görə Ermənistana qarşı ehtiyatlı və qətiyyətli mövqeyi olub.

Pakistan həmişə Azərbaycanın ərazi bütövlüyünü dəstəkləyib və Qarabağ məsələsində Ermənistanın işğalçı siyasətinə etirazını açıq şəkildə ifadə edib.

Beləliklə, iki ölkə arasında diplomatik münasibətlərin qurulması tarixi hadisə kimi qiymətləndirilir, lakin bu addım Pakistanın Azərbaycanla strateji tərəfdaşlıq əlaqələrinə və Qarabağ məsələsindəki prinsipial mövqeyinə təsir etməyəcək.

Bizim.Media