Tualet kağızı tarixdə qaldı - Onu yeni gigiyena qurğusu əvəz edəcək

2026-cı ildə getdikcə daha çox insan adi tualet kağızından imtina edərək unitazlara quraşdırılan xüsusi bide qapaqlarından istifadə edir.

Bizim.Media “TheCoolist” nəşrinə istinadən xəbər verir ki, bu qurğular isti su ilə təmizləmə, oturacağın qızdırılması və isti hava ilə qurutma funksiyalarına malikdir.

Söhbət unitazın adi qapağını əvəz edən və su təchizatı sisteminə qoşulan xüsusi oturacaqlardan gedir. İstifadə zamanı qurğudan çıxan xüsusi başlıq vasitəsilə su püskürdülür. İstifadəçi suyun temperaturunu, təzyiqini və istiqamətini tənzimləyə bilir.

Elektrikli modellərdə başlığın avtomatik təmizlənməsi və uzaqdan idarəetmə kimi əlavə funksiyalar da mövcuddur.

Nəşrin istinad etdiyi 2024-cü il Houzz Bathroom Trend Report hesabatına görə, hamam otağında təmir aparan hər beş ev sahibindən ikisindən çoxu xüsusi funksiyalı unitazlara üstünlük verib. Bu seçimlər arasında bide qapaqları ilk sırada yer alıb.

Texnologiyanın yayılmasına 2020-ci ildə yaranan tualet kağızı qıtlığı da təsir göstərib. ABŞ-ın TUSHY şirkəti 2015-ci ildən bəri təxminən 2,5 milyon bide satdığını açıqlayıb.

Bizim.Media