Bazardan pomidor alanda yalnız rənginə baxmayın - Ən dadlısını seçməyin sirri

Bazarda qırmızı və cəlbedici görünən pomidorlar arasında ən dadlısını seçmək düşündüyünüz qədər asan deyil. Xarici görünüşünə aldanaraq aldığınız pomidor evə çatdıqda dadsız və bərk çıxa bilər. Halbuki bir neçə sadə üsulla ən ləzzətli pomidoru asanlıqla müəyyən etmək mümkündür.

Bizim.Media xarici KİV-ə istinadən xəbər verir ki, ən dadlı pomidoru seçməyin etibarlı yolu onun qoxusunu yoxlamaqdır.

Pomidorun sap hissəsini və ya yaşıl yarpaqlarını yüngülcə iylədikdə təzə torpaq və bağ ətri hiss edirsinizsə, bu, məhsulun təbii və yetişmiş olduğunu göstərir. Əgər pomidorun heç bir qoxusu yoxdursa və ya qoxusu çox zəifdirsə, böyük ehtimalla o, tez yığılıb və tam yetişməyib.

Çəkisinə və quruluşuna diqqət edin

Eyni ölçüdə görünən iki pomidor arasında seçim edərkən daha ağır olanına üstünlük verin. Ağır pomidor onun daha sulu və dolu olmasının əsas göstəricisidir. Bundan əlavə, pomidora yüngülcə basdıqda o, nə çox sərt, nə də həddindən artıq yumşaq olmalıdır. Barmağın altında azacıq elastiklik hiss etdirən, qabığı hamar və gərgin olan pomidorlar ən təzə məhsullar hesab edilir.

Rəng və forma qüsurlarından çəkinməyin

Bazarda tam hamar və eyni rəngdə görünən pomidorlar hər zaman ən dadlı seçim olmur. Sap hissəsinin ətrafında təbii yaşılımtıl çalarlar olan və ya forması bir qədər nahamar görünən pomidorlar adətən hibrid deyil, ənənəvi toxumlardan yetişdirilən məhsullardır. Təbii yetişmə prosesini tam başa vurmuş belə pomidorların ətri daha güclü, şəkər miqdarı isə daha yüksək olur. Bu da onların daha dadlı və aromatik olmasını təmin edir. (lent.az)

Bizim.Media