İran zənginləşdirilmiş uranı ABŞ-a verməyəcək - Xətibzadə

İran hələlik ABŞ rəsmiləri ilə yeni şəxsi danışıqlar mərhələsinə hazır deyil.

Bizim.Media xəbər verir ki, bunu şənbə günü İran xarici işlər nazirinin müavini Səid Xətibzadə bildirib. O, Vaşinqtonun əsas məsələlər üzrə maksimalist tələblərdən imtina etməsinin vacibliyini vurğulayıb.

Antalyada keçirilən diplomatik forum çərçivəsində Associated Press agentliyinə müsahibə verən Xətibzadə ölkəsinin zənginləşdirilmiş uranı ABŞ-a təhvil verməyəcəyini də deyib və Donald Trampın bu barədə açıqlamalarını rədd edib.
 

“Deyə bilərəm ki, heç bir zənginləşdirilmiş material ABŞ-a göndərilməyəcək. Bu, ilk addım deyil və sizi əmin edirəm ki, aramızdakı hər hansı problemi həll etməyə hazır olsaq da, ilk addım sayılmayan heç nə ilə razılaşmayacağıq”, - deyə İran XİN başçısının müavini bildirib.

Xətibzadənin sözlərinə görə, tərəflər arasında çoxsaylı mesaj mübadiləsi aparılıb. Bununla belə, o, ABŞ-ı İranın həddindən artıq saydığı tələblərdə israrlı olmaqda ittiham edib.

Xatırladaq ki, Tramp cümə günü ABŞ-ın İrana gedərək “bütün nüvə tozunu toplayacağını” demişdi. O, ötən il ABŞ zərbələri nəticəsində ciddi ziyan görmüş nüvə obyektlərinin altında basdırıldığı ehtimal olunan 440 kiloqram zənginləşdirilmiş uranı nəzərdə tuturdu.

Bizim.Media