Keçmiş Formula-1 pilotu atasını öldürdü

Sabiq “Formula-1” pilotu Antolin Qonzales atasını bıçaqla öldürdüyünü etiraf edib.

Bizim.Media 20minutus.es-ə istinadən xəbər verir ki, 23 yaşlı ispaniyalı idmançı ölümün mübahisə zamanı “təsadüfi” olduğunu iddia edir və cəzanın yüngülləşdirilməsini tələb etmək niyyətindədir.

Hadisə iyulun 5-də Aranda de Duero şəhərinin kənarında ailəyə məxsus sənaye binasında baş verib. Təqsirləndirilən şəxsin sözlərinə görə, onunla atası arasında qızğın mübahisə düşüb və bu zaman kişi oğluna bıçaqla hücum edib. Mübarizə zamanı Qonzales atasının boynuna bıçaq zərbəsi endirib.

56 yaşlı kişi aldığı zərbələrdən sonra dünyasını dəyişib. Hadisədən sonra Antolin bıçağı ataraq qaçmağa cəhd edib. O, hüquq mühafizə orqanları tərəfindən tapılaraq həbs edilib.

Qonzalesin ailəsi onu müdafiə edərək, mərhumun illərdir silsiləvi şəkildə yaxınlarına qarşı zorakılıq etdiyini iddia edib.

2018-ci ildə “Formula-3” üzrə vitse-çempion olan Antolin Qonzales anasının biznesinə kömək etmək üçün karyerasını bitirib. Ailənin dediyinə görə, o, anasını atasından qorumaq və dəstəksiz qalmamasını təmin etmək istəyib.

Rəşad Rafiqoğlu, Bizim.Media