Rusiya XİN-dən Ukraynanın İran gəmisinə hücumuna REAKSİYA

Ukraynanın Xəzər dənizi akvatoriyasında Həştərxandan mülki yüklə hərəkət edən İranın ticarət gəmisinə hücumu beynəlxalq hüquq normalarını pozan bir təcavüz aktıdır.

Bizim.Media xəbər verir ki, bu barədə Rusiya Xarici İşlər Nazirliyinin rəsmi nümayəndəsi Mariya Zaxarova bildirib.

"Bu cür cinayətkar addımlar Kiyev rejiminin terror coğrafiyasını genişləndirmək istədiyini açıq şəkildə sübut edir", — deyə o qeyd edib.
 

Diplomat həmçinin vurğulayıb ki, Xəzərdə mülki gəmilərə növbəti hücum aktı Xəzəryanı ölkələrin regional təhlükəsizliyinə açıq təhdid yaradır.

Qeyd edək ki, iyulun 26-da İran Xarici İşlər Nazirliyi Ukrayna qüvvələrinin Xəzər dənizində İran ticarət gəmisinə hücum etdiyini bəyan edib. Partlayış nəticəsində heyət üzvlərindən biri həyatını itirib. Tehran baş verənləri təcavüz aktı adlandırıb və Kiyevi Rusiya-Ukrayna münaqişəsini döyüş zonasından kənara yaymaq cəhdində ittiham edib.

Bizim.Media