Fransada bir ay ərzində üç muzey qarət olunub

Fransada iyul ayı ərzində üç muzeydə oğurluq hadisəsi baş verib.

Bizim.Media xəbər verir ki, bu barədə Le Parisien nəşri məlumat yayıb.

Nəşrin yazdığına görə, qarətlər Tarn, Aşağı Reyn (Bas-Rhin) və Kot-d'Or departamentlərində yerləşən muzeylərdə qeydə alınıb.
 

Son oğurluq iyulun 24-də Kot-d'Or departamentində yerləşən Şatiyon Muzeyində baş verib. Naməlum şəxslər burada saxlanılan, məşhur Viks xəzinəsinin bir hissəsi hesab olunan qızıl boyunbağını oğurlayıblar.

İyulun 5-də isə Aşağı Reyn departamentindəki Lalik Muzeyindən ümumi dəyəri 4,5 milyon avrodan çox olan 27 ədəd zinət əşyası oğurlanıb.

Bundan əlavə, iyulun 1-nə keçən gecə Tarn departamentində yerləşən Montan Arxeologiya Mərkəzindən eramızdan əvvəl təxminən 50-ci ilə aid olduğu bildirilən, ümumi dəyəri 120 min avrodan artıq olan 40-a yaxın qızıl sikkə aparılıb.

Le Parisien qeyd edir ki, qısa müddət ərzində baş verən bu hadisələr muzeylərin yenidən mütəşəkkil cinayətkar qrupların hədəfinə çevrildiyini göstərir.

Bizim.Media