Politoloq Vəfa Quluzadə bildirdi ki, Putin başqa fikirlər səsləndirsə də, onun komandası SSRI-nin bərpasından danışır: “Rusiya avtoritar dövlətdir. Avtoritar dövlətlərdə isə, adamlar özbaşına danışmaq haqqına malik deyil. Ələlxüsus da siyasətçilər, millət vəkilləri komanda alandan sonra danışırlar. Yəni, bu adamlar birinci şəxsin xeyir-duasını alandan sonra danışırlar. Bu gün Putinə yaxınlığı ilə seçilən yazıçılar, sənət adamları, siyasətçilər Sovet imperiyasının bərpasından danışır. Ona görə də mən Putinin dediklərinə inanmıram”.
Politoloq onu da əlavə etdi ki, Putin praqmatik siyasətçi olduğu üçün belə gedişlər edir. Çünki, o Sovet imperiyasını bərpa etməyin mümkün olmadığını bilir: “Putin qərbə demək istəyir ki, siz bugünə qədər nə əldə etmisiniz halal xoşunuz olsun. Mən də Avrasiya Ittifaqını yaradıram və bu ittifaqa daxil olan ölkələr mənim rəhbərliyim altında olacaq. Siz də bu ərazilərdə bütün əlaqələrinizi mənim vasitəmlə həyata keçirin. Putin nəyi güc mövqeyindən həll edə biləcəksə, onu edəcək. Necə ki, Krımı güc mövqeyindən istifadə edib ilhaq etdi. Ukraynanı bütünlükdə isə ram edə bilmir. Ona görə də indi özünü xoşməramlı göstərir”.
Siyasi ekspert Rahim Hacıyev hesab edir ki, Putinin addımları səsləndirdiyi fikirləri inkar edir. “Son aylarda Putin hökumətinin atdığı addımlar onun heç də səmimi olmadığını göstərir. Hələ uzun illər öncə Putin Sovet Ittifaqının dağılmasını, 20-ci əsrin ən böyük geopolitik faciəsi kimi qiymətləndirmişdi. Bu açıqlama Putinin tarixə necə münasibət göstərməsini nümayiş etdirdi”.
Ekspert qeyd etdi ki, Putin hökuməti təhlükəsiz və çiçəklənən dünya üçün çalışsaydı, insan azadlıqlarının və sivil demokratik dəyərlərin bərqərar olunması üçün ciddi səylər göstərərdi: “Krımı işğal etməklə Putin Rusiyanın dünyada sülh və təhlükəsizlik üçün böyük təhlükə olduğunu sübut etdi. Qərb dünyası açıq şəkildə işğalçı siyasət aparan Rusiyanı cilovlaya bilməsə, Putin aqressiv siyasətini davam etdirəcək”.
Azadliq.info
