Bakıda Azərbaycan Kibertəhlükəsizlik Təşkilatları Assosiasiyası (AKTA) və Avropa Komissiyasının birgə təşkilatçılığı ilə 13 – 14 dekabr 2022-ci il tarixlərində “Kibertəhlükəsizlik ekosisteminin gücləndirilməsi” adlı 2 günlük seminar keçirilib.
Bizim.Media xəbər verir ki, tədbirdə dövlət və özəl qurumlardan, habelə müxtəlif universitetlərdən olan 100-ə yaxın nümayəndə iştirak edib.
Açılış nitqində AKTA-nın İdarə Heyətinin sədri Elvin Balacanov iştirakçıları salamlamış, ölkədə kibertəhlükəsizlik ekosisteminin gücləndirilməsinin və bu tədbirin əhəmiyyətini vurğulayıb.
Avropa Komissiyasının TAIEX alətinin dəstəyilə həyata keçirilən bu tədbirin əsas məqsədi təcrübə mübadiləsi yolu ilə Azərbaycan Respublikasında informasiya təhlükəsizliyi və kibertəhlükəsizlik, o cümlədən İKT sahəsində ekosistemin, eləcə də qanunvericilik bazasının gücləndirilməsinə töhfənin verilməsidir.
Seminar çərçivəsində Avropa Komissiyasının müvafiq ekspertləri tərəfindən “Kibertəhlükəsizlik və dayanıqlıq: kritik infrastrukturun təhlükəsizliyinin gücləndirilməsi”, “Kibertəhlükəsizlik sahəsində idarəetmə”, “Kibertəhlükəsizlik sahəsində qanunvericiliyinə dair təcrübə mübadiləsi”, “Kiber potensialın gücləndirilməsi” və sair mövzular üzrə məruzələr dinlənilmiş və müzakirələr aparılıb.
Qeyd edək ki, Azərbaycan Kibertəhlükəsizlik Təşkilatları Assosiasiyası (AKTA) 2022-ci ildə təsis edilmiş və özündə ölkənin informasiya texnologiyaları və kibertəhlükəsizlik üzrə ixtisaslaşmış şirkət və təşkilatlarını birləşdirir. AKTA ölkəmizdə kibertəhlükəsizlik ekosisteminin gücləndirilməsi və potensialının artırılmasına dəstək verir.
Bizim.Media
