Dünən Mərkəzi Seçki Komissiyası
(MSK) tərəfindən dairə seçki komissiyalarının (DSK) sədrləri üçün Bakıda
başlayan ənənəvi bir həftəlik seçki hüququ üzrə ixtisaslaşmış kursların
açılışında ATƏT-in Bakı ofisinin rəhbəri Koray Tarqay çıxış edib. Moderator.az-ın
xəbərinə görə, Koray Tarqay deyib ki, Türkiyə əsillidir və birlikdə bütün
dünyaya Azərbaycanda seçkilərin ədalətli və demokratik keçirildiyini nümayiş
etdirməliyik.
Koray Tarqay bildirib ki,
prezident İlham Əliyevin 2006-cı və 2011-ci il sərəncamları Azərbaycanla
demokratik və azad seçkilərin keçirilməsi üçün lazımi zəmini yaradıb:
“Azərbaycanın qoşulduğu beynəlxalq sənədlərdə azad və demokratik
seçkilərin keçirilməsi əksini tapıb.
Bundan öncəki seçkilərdə müsbət
irəliləyişlər qeydə alınıb. Bu, asan proses deyil, tək qanunlarla mümkün deyil.
İndiyə qədər görülən işləri müsbət qarşılamalıyıq, ciddi irəliləyişlər var.
Amma bunlar yetərli deyil, seçkilər təcrübədir, Azərbaycanda bundan əvvəlki
seçkilərdə atılan adımların nəticəsində gələcəkdə daha yaxşı seçkilərin
keçirilməsi üçün təcrübə toplanıb”. Koray Tarqay onu da qeyd edib ki,
beynəlxalq təşkilatların seçkiləri qiymətləndirməsi vacibdir, ancaq ən
əsas Azərbaycan xalqının seçkilərdən razı qalmasıdır: “ATƏT olaraq bizim
vəzifəmiz seçki hazırlıqlarına yardımçı olmaq, əməkdaşlıq etməkdir. İnşallah,
bu addımları birlikdə atacağıq. MSK və Prezident Administrasiyası ilə birgə
həyata keçirəcəyimiz proqramlar var.
Xüsusən gənclərin və xanımların
seçkilərə cəlb etməyə çalışacağıq. Azərbaycanın müxtəlif bölgələrində bununla
bağlı tədbirlər keçirəcəyik. Amma DSK və məntəqə seçki komissiyalarının birbaşa
vəzifəsi təklikdə seçicilərin razı qalmasını təmin etməkdir. Kimsə deməsin ki,
mən səs verə bilmədim, yaxud səsim başqasına getdi. Başqa ölkələrdəki seçkilərin
yaxşı təcrübələrindən istifadə etmək lazımdır”.
Koray Tarqay nəzərə çatdırıb ki,
seçki məsələsi ilə bağlı Azərbaycandakı xarici ölkə diplomatları koordinasiya şəklində çalışırlar.
MSK sədri Məzahir Pənahov da öz
növbəsində seçki siyahıları ilə məsələyə cavab olaraq bildirib ki, mütləq
əksəriyyət ölkələrdə seçici özü seçici siyahısına düşməlidir: “Əgər həmin
ölkələrdə müəyyən olunmuş vaxtda seçici siyahısına düşməsə, istər gedib
Prezident Administrasiyasının qarşısında aksiya keçirsin, siyahıya düşə bilməz.
Ancaq Azərbaycanda vəziyyət
fərqlidir. Seçki siyahısı davamlı dürüstləşdirilir. Seçki Məcəlləsinə görə,
seçici şəxsiyyət vəsiqəsini seçki günü təqdim edirsə, ərazidə yaşayırsa, adı
əlavə seçki siyahısına salına və səs verə bilər. Bu günə qədər bu məsələ ilə
bağlı hər hansı şikayət daxil olmayıb. Mən beynəlxalq təşkilatların
nümayəndələrinə deyirəm ki, Azərbaycanda seçici siyahısı bir çox Avropa
ölkələrindən fərqlənir. Ona görə də seçici siyahısı məsələsini
dramatikləşdirmək yersizdir”.
