Ermənistanda parlament seçkiləri: Saat 14:00-a olan seçici fəallığı - 33,84%

Ermənistanda keçirilən növbəti parlament seçkilərində saat 14:00-a olan seçici fəallığı rəsmi olaraq açıqlanıb. Mərkəzi Seçki Komissiyasının (MSK) təqdim etdiyi son rəqəmlər seçicilərin aktivliyinin əvvəlki seçkilərlə müqayisədə nəzərəçarpacaq dərəcədə yüksək olduğunu göstərir.

Bizim.Media erməni KİV-nə istinadən xəbər verir ki, günorta saatlarına qədər ölkə üzrə artıq 847 226 seçici məntəqələrə yaxınlaşaraq səs verib.

MSK-nın məlumatına görə, ölkə üzrə ümumi seçici fəallığı 33,84% təşkil edib. Müqayisə üçün qeyd edək ki, əvvəlki parlament seçkilərində eyni saatda bu göstərici cəmi 26,82% (695 626 seçici) olmuşdu. Cari seçkilərdə fəallıq əvvəlki prosesdən təxminən 8% daha yüksəkdir.

Seçicilərin ümumi sayının üçdə birindən çoxunun cəmləşdiyi paytaxt İrəvanda və regionlarda fəallıq belə bölünüb:

İrəvan şəhəri: Paytaxtda saat 14:00-a qədər seçicilərin 33,38%-i (283 601 nəfər) səsvermə hüququndan istifadə edib.

Sünik (Zəngəzur) vilayəti: Ölkə üzrə ən yüksək aktivlik ənənəvi olaraq yenə bu bölgədə qeydə alınıb. Vilayət sakinləri yüksək siyasi fəallıq nümayiş etdirərək artıq 39,02% göstərici ilə liderliyə yüksəliblər.

Xatırladaq ki, səsvermə prosesi axşam saat 20:00-a qədər davam edəcək və bundan sonra bülletenlərin sayılmasına başlanılacaq.

Bizim.Media