“Biz hər addımda qurbanlar vermişik və təəssüf ki, onların böyük qismini Rusiya zülmünə vermişik” - VİDEO

“Bütün bu işlər dövlətimizin rəhbərinin uca diqqəti sayəsində, müvafiq strukturlar tərəfindən yüksək səviyyədə həyata keçirilib. Cənazələrimi təhvil aldım, Rusiyanın amansız rejiminin qanlı pəncəsində canını tapşırmış qardaşlarım, o əzabkeş insanlar artıq müqəddəs vətən torpağına qovuşdu”.

Bizim.Media xəbər verir ki, bu barədə jurnalistlərə açıqlamasında Yekaterinburqda Rusiya Federal Təhlükəsizlik Xidməti (FTX) əməkdaşları tərəfindən öldürülən azərbaycanlı qardaşlar – Ziyəddin və Hüseyn Səfərovların qardaşı Seyfəddin Hüseynli bildirib.

“Biz hər addımda qurbanlar vermişik və təəssüf ki, bu qurbanların böyük bir qismini Rusiya zülmünə vermişik. Ümidvaram ki, bu, o qurbanların silsiləsinin son həlqəsi olacaq”, - S. Hüseynli qeyd edib.

Qeyd edək ki, iyunun 27-də səhər saatlarında Yekaterinburqda azərbaycanlıların yaşadığı evlərə OMON-un keçirdiyi basqın zamanı tanınmış jurnalistin qardaşları – Səfərovlar öldürülüb, bir neçə nəfər isə saxlanılıb.

Azərbaycan Xarici İşlər Nazirliyi iyunun 28-də rəsmi bəyanat yayaraq hadisəyə kəskin etiraz edib. Həmçinin Rusiyanın müvəqqəti işlər vəkili XİN-ə çağırılıb və ona sərt nota təqdim olunub.



Bizim.Media