Ədalət Şükürov 55 yaşını Moskvada Eminlə birgə qeyd etdi – VİDEO

Azərbaycanın Əməkdar artisti, Dağıstanın Xalq Artisti Ədalət Şükürovun bu gün 55 yaşı tamam olur.

Bizim.Media xəbər verir ki, bu əlamətdar günü o, Moskva restoranlarından birində azərbaycanlı müğənnilərlə birgə keçirib.

Xalq artisti Emin Ağalarov onu doğum günü münasibəti ilə təbrik edib və fürsətdən istifadə edərək pərəstişkarlarına salam da göndərib.

Qeyd edək ki, Ədalət Şükürov 22 aprel 1966-cı ildə Sumqayıt şəhərində anadan olub. Əslən Qazax rayonunun Kəmərli kəndindəndir. Orta məktəbi bitirdikdən sonra hərbi xidmətə yollanıb. 3 il "Novaya Zemlya" adasında, sualtı qayıqda hərbi xidmətini çəkib.

Hərbi xidməti bitirib, geri döndükdən sonra 1987-ci ildə Sankt-Peterburq Mədəniyyət Universitetinin "kütləvi tədbirlər rejissoru" fakultəsinə daxil olub. Ali təhsil aldıqdan sonra Ədalət Şükürov Sankt-Peterburqun 5-ci kanalında efirə gedən "Adamovo yabloko" verilişində rejissor işləyib.

Bir müddət sonra o, Luqa şəhərinin baş rejissoru olub və kütləvi tədbirlər keçirib. "Salsa Viva" rəqs məktəbini bitirib. Baltik Turizm və Biznes Akademiyasında aspiranturada oxuyub.

Elmi işini Sankt-Peterburqda müdafiə edib. 2007-ci ildən İqtisad elmləri namizədidir. Dizaynerliklə də məşğul olan Ədalət Şükürov, arabir rəssamlıq da edir.

1992-cı ildən mahnı bəstələməyə və şeirlər yazmağa başlayır. Daha sonra musiqi və mətnləri aranjman edərək, ifa edir. Oxuduğu mahnılar Azərbaycanda çox sevildiyindən o, 2000-ci ildə vətənə qayıdıb və müğənnilik fəaliyyətini burada davam etdirib.
 

Bizim.Media