Cennifer Lopez Beverli-Hillzdəki 50 milyon dollar dəyərində olan dəbdəbəli malikanəsini yenidən sata bilməyib.
Bizim.Media xəbər verir ki, "TMZ" nəşrinin məlumatına görə, potensial alıcı böyük məbləğdə beh ödəsə də, sövdələşmə baş tutmayıb.
Evin yeni sahibi texnologiya və maliyyə sahəsində tanınmış bir iş adamı olmalı idi, lakin naməlum səbəblərdən o, alışdan imtina edib. Sövdələşmənin ləğvinə nəyin səbəb olduğu hələlik açıqlanmır.
Cəmi bir neçə gün əvvəl evin satışı ilə bağlı uzun müddətdir davam edən prosesin nəhayət başa çatacağı görünürdü. Cennifer Lopez və Ben Afflekin 2023-cü ildə təxminən 61 milyon dollara aldıqları, sahəsi təxminən 4,3 min kvadratmetr olan malikanə boşanmadan sonra yenidən satışa çıxarılmışdı.
Satış müddətində evin qiyməti dəfələrlə endirilib. İlkin olaraq əmlak 68 milyon dollar qiymətləndirilsə də, alıcı tapmaq üçün edilən bir neçə uğursuz cəhddən sonra dəyəri 50 milyon dollara qədər azaldılıb.
Malikanəyə 12 vanna otağı, 100 yerlik ev kinoteatrı, 30 nəfərlik yemək otağı və makiyaj və saç düzümü üçün peşəkar zonası olan ayrıca "qlem-otaq" daxildir.
Ben Affleklə 2025-ci ilin əvvəlində başa çatan rəsmi boşanmadan sonra Cennifer Lopez daşınmaz əmlak üzərində tam nəzarəti ələ alıb və alıcı axtarışlarını davam etdirib. Lakin indi o, bu prosesə yenidən başlamaq məcburiyyətində qalacaq.
Bizim.Media
