Bu il Met Gala mərasimi təkcə məşhurların geyimləri və qırmızı xalça çıxışları ilə deyil, həm də tədbirin əsas sponsorları ilə bağlı müzakirələrlə gündəmə gəlib.
Bizim.Media xəbər verir ki, bu barədə Daily Mail insayderlərə istinadən məlumat yayıb.
Məlumata görə, “Amazon”un qurucusu Ceff Bezos və həyat yoldaşı Loren Sançesin tədbirin əsas sponsorları və fəxri həmsədrləri arasında yer alması moda sənayesində ciddi narazılıq doğurub.
Moda sənayesindən olan mənbələrdən biri bildirib ki, cütlüyün iştirakı Met Gala-nın uzun illər formalaşmış eksklüzivlik ənənəsi və mədəni statusu baxımından “ağrılı dəyişiklik” kimi qəbul olunur.
İnsayderin sözlərinə görə, bu qərar tədbiri moda dünyasının mühüm institutu hesab edənlər üçün “çox ağrılı və narahatedici”dir və sənayenin bir çox nümayəndəsi bunu “ənənələrə şillə” kimi qiymətləndirir.
Məlumata görə, Bezos və Sançesin tədbirə qoşulması hazırlıq prosesinə də təsir edib. İddialara əsasən, Hollivudun ən tanınmış simalarından biri olan aktrisa Meril Strip tədbirdə mümkün həmsədr rolundan imtina edib. Bunun səbəbi kimi Met Gala-nın artıq Bezos ailəsinin maliyyə dəstəyi və ictimai statusu ilə əlaqələndirilməsi göstərilir. Aktrisanın nümayəndələri bu məlumatı şərh etməyiblər.
Cütlüyün iştirakı elan edildikdən sonra sosial şəbəkələrdə də tədbirin boykot edilməsi çağırışları yayılıb. Bəzi istifadəçilər Bezosa qarşı kəskin tənqidlər səsləndiriblər.
Moda sənayesindən olan digər mənbələr bildirirlər ki, Met Gala tarixən daha çox liberal çevrələrlə, demokrat siyasətçilərə dəstək və proqressiv təşəbbüslərlə assosiasiya olunub. Bu səbəbdən milyarder cütlüyün tədbirdə əsas sponsor kimi yer alması sənaye daxilində daxili gərginlik yaradıb.
Tənqidlər Bezosa məxsus şirkətlərdə ixtisarlar fonunda daha da güclənib. Onun sərvətinin yüz milyardlarla dollarla ölçüldüyü bir vaxtda Met Gala kimi elit tədbirə böyük maliyyə dəstəyi verməsi bəziləri tərəfindən kəskin qarşılanıb.
Müşahidəçilərin fikrincə, ayrı-ayrı milyarderlərin belə tədbirləri maliyyələşdirməsi moda sənayesində təsir dairəsini genişləndirmək cəhdi kimi görünür. Halbuki Met Gala ənənəvi olaraq daha çox brendlər və iri korporasiyalarla əlaqələndirilirdi.
Mənbələr qeyd edirlər ki, Bezos və Sançesin əsas sponsorlar sırasında yer alması Met Gala-nın uzun illərdir əsas siması sayılan Anna Vinturun da bu qərara razılıq verdiyini göstərir.
Bəzi ekspertlər hesab edirlər ki, Vinturun bu addımı lüks seqmentdə iqtisadi vəziyyətin dəyişməsi ilə bağlı ola bilər. Pandemiyadan sonra bir sıra brendlərin böyük mədəni tədbirlərə yatırımları azalıb və bu, təşkilatçıları yeni maliyyə mənbələri axtarmağa vadar edib.
Qeyd olunur ki, Bezos və Sançes son illər dəfələrlə ictimai müzakirələrin mərkəzinə düşüblər. Onların 2025-ci ildə Venesiyada keçirilən dəbdəbəli toyu etirazlarla müşayiət olunub. Bundan başqa, Blue Origin şirkətinin kosmik layihələri və Sançesin qadın heyətlə kosmosa uçuşu da bəzi dairələrdə “həddindən artıq nümayişkaranə və elitist” addım kimi tənqid edilib.
Moda sənayesindəki narazılığın əsas səbəbi isə yalnız sponsorların kimliyi deyil. Mənbələrin fikrincə, bu qalmaqal müasir dünyada var-dövlət, nüfuz və mədəni hakimiyyət anlayışlarının dəyişməsini də göstərir.
Bizim.Media
