Avropa Rusiya qazından imtina edir, lakin ABŞ-dan yeni asılılığa düşür – “Forbes”

Avropa ölkələrinin Rusiya qazından imtina etməsinə baxmayaraq, ABŞ-ın enerji resursları olmadan keçinməsi çətin olacaq.

Bizim.Media Forbes-ə istinadən xəbər verir ki, Avropada Rusiya mayeləşdirilmiş təbii qazının (LNG) tədarükünə dair son uzunmüddətli müqavilələrin başa çatmasına yeddi həftədən də az vaxt qalıb. Bəzi ölkələr hələ də bu qazla maraqlansa da, Avropa İttifaqı onun alışına qadağa qoyub.

Nəşr qeyd edir ki, Avropa öz prinsiplərinin ona neçəyə başa gələcəyini öyrənməli olacaq. Bu arada ABŞ Rusiya yanacağını almaqda davam edəcək. Bununla belə, Avropa ölkələrinin Amerika enerji resursları olmadan keçinməsi çətin görünür.

Jurnalistlərin xatırlatdığına görə, Rusiyanın Ukraynaya qarşı genişmiqyaslı işğalından əvvəl Aİ ölkələrinə ildə 152 milyard kubmetr qaz tədarük edilirdi. Bu, Avropa İttifaqının qaz idxalının təxminən 45 faizini təşkil edirdi. 2025-ci ildə isə bu göstərici 36 milyard kubmetrə, yaxud 12 faizə qədər azalıb.

Ötən il Aİ ölkələri Rusiya boru kəməri qazına təxminən 6,7 milyard dollar, Rusiya mayeləşdirilmiş təbii qazına isə 7,6 milyard dollar xərcləyiblər. Bu, Kreml üçün kifayət qədər böyük məbləğdir. İndi Avropa İttifaqı həmin məbləği sıfıra endirmək istəyir.

Nəşrin məlumatına görə, Avropa ölkələrinin Rusiya LNG-sinin tədarükünə dair uzunmüddətli müqavilələri yanvarın 1-də, boru kəmərləri ilə qaz tədarükünə dair müqavilələri isə 2027-ci il sentyabrın 30-da başa çatır. Anbarların doldurulmasında çətinlik çəkən ölkələr üçün bu müddət ən gec noyabrın 1-dək uzadıla bilər. Qadağa qüvvəyə mindikdən sonra Avropa şirkətləri Rusiya LNG-sini dünyanın heç bir yerində ala, sata və ya daşıya bilməyəcəklər.

Bununla belə, Macarıstan və Slovakiya problemi qalır.

Bu ölkələr Qara dənizin altından keçən “Türk axını” boru kəməri ilə Rusiya qazını almağa davam edirlər. Onlar, həmçinin Avropa Məhkəməsinə iddia qaldıraraq qadağanın bütün üzv ölkələrin yekdil razılığını tələb edən sanksiyanın gizli forması olduğunu bildiriblər.

Bizim.Media