Oktyabrın 2-si yerli vaxtla günortadan sonra Rusiyanın İrkutsk vilayətinin qubernatoru İqor Kobzev bölgədə xüsusilə təhlükəli bir infeksiyaya şübhəli bir hal barədə məlumatın yayıldığını açıqlayıb.
Bizim.Media Rusiya mətbuatına istinadən xəbər verir ki, yerli mənbələr xəstənin İrkutsk Taunla Mübarizə İnstitutunda işləyən və 2 oktyabr gecəsi Şelexovdakı xəstəxanada vəfat edən 28 yaşlı Darya Şipilova olduğunu bildiriblər.
Rospotrebnadzor dərhal bölgədə tam epidemiya əleyhinə tədbirlər təşkil edib. Rusiya
Federasiyasının Baş Dövlət Sanitariya Həkimi Anna Popovanın iştirakı ilə bölgədə regional sanitariya və epidemiya əleyhinə komissiyanın fövqəladə iclası keçirilib və əməliyyat tədbirləri planı təsdiq edilib.
Məlumata görə, Şipilova ilə təmasda olmuş şəxslər karantinə alınıb.
Rəsmi məlumatlar dərc olunmamışdan əvvəl Rusiya teleqram kanalları və sosial media botları qıza pnevmonik taun diaqnozu qoyulduğunu iddia ediblər.
Şipilovanın iş yerində bəzi biomateriallar olan sınaq borusunu sındırmış ola biləcəyi barədə təsdiqlənməmiş məlumatlar yayılıb.
Şelexovdakı İrkutsk Avtomatlaşdırılmış Taunla Mübarizə Zavodunun direktorunun əlavə tədbirlər görmək və zavodda maska tələbi tətbiq etmək qərarına gəlməsi ilə bağlı iddialar da yayılıb.
Şelexovdakı xəstəxanaların karantinə bağlandığı deyilsə də, daha sonra onların adi rejimdə fəaliyyət göstərdiyi açıqlanıb. Xəstənin ölüm səbəbi rəsmi olaraq naməlum etiologiyalı pnevmoniya elan edilib (səbəb araşdırılır) və onun İrkutsk Taunla Mübarizə İnstitutunun əməkdaşı olduğu təsdiqlənib.
Məlumata görə, xəstədən götürülən nümunədə iş fəaliyyəti ilə əlaqəli mikroorqanizmlər aşkarlanmayıb.
Qeyd edilib ki, həmkarları son 10 gündə yoluxucu xəstəliklərlə bağlı həkimə müraciət etməyiblər. Son məlumatlara görə, infeksiyaya yoluxmuş şəxslə təmasda olmuş 197 nəfər hazırda tibbi müşahidə altındadır, onlarda təhlükəli infeksiya əlamətləri aşkar edilməyib və test nəticələri neqativdir.
Qeyd edək ki, Darya Şipilova İrkutsk Taunla Mübarizə İnstitutunda laboratoriya işçisi olub. O, infeksiyaya qarşı orqanizmin immun cavabını tədqiq edirdi. O, iş prosesi zamanı taun törədicisi olan sınaq şüşəsini sındırıb. Buryatiya regionunun rəsmiləri bu məlumatı təsdiqləyiblər.
Nuranə, Bizim.Media
