Körfəzdə yeni gərginlik: Bəhreyn İranın olduğu masaya oturmayacaq

Bəhreyn İranla diplomatik əlaqələr bərpa olunana qədər Tehranla birgə keçirilən kollektiv görüşlərdə iştirak etməyəcək. 

Bizim.Media "Iranintl" informasiya agentliyinə istinadla xəbər verir ki, bunu Bəhreyn Xarici İşlər Nazirliyi bəyan edib. 

Bəyanatda qeyd olunub ki, bu səbəbdən Manama Hörmüz boğazında gəmiçiliklə bağlı Omanda keçirilməsi planlaşdırılan görüşə də qatılmayacaq.

Nazirlik Bəhreynin mövqeyinin rəsmi kanallar vasitəsilə Oman tərəfinə çatdırıldığını bildirib. Manama mübahisələrin həlli üçün dialoqa üstünlük verdiyini də vurğulayıb.

Bəhreyn eyni zamanda Hörmüz boğazı ilə bağlı hər hansı razılaşmada Körfəz Əməkdaşlıq Şurasının bütün üzv dövlətlərinin iştirak etməsinə çağırış edib.

Qeyd edək ki, İran və Körfəz ölkələrinin Omanda görüşü sentyabrın 14-nə planlaşdırılır.

Bizim.Media