Rusiyanın Ukraynaya qarşı başladığı müharibə təhlükəsizlik və texnologiya sahəsində qlobal dəyişikliklərin əsas amili olaraq qalır. Cəbhədəki döyüş əməliyyatları isə yaxın gələcəkdə atəşkəsin gözlənilmədiyini sübut edir.
Bizim.Media xəbər verir ki, bu barədə Ukrayna Prezidenti Vladimir Zelenskinin "Telegram" kanalında məlumat verilib.
Dövlət başçısı qeyd edib ki, döyüş əməliyyatları hər gün davam edir və Rusiya tərəfindən intensivliyin azalmasına dair heç bir əlamət yoxdur. Onun qiymətləndirməsinə görə, Moskva müharibəni bitirməyə hazır olduğunu nümayiş etdirmir, bu isə yeni mümkün hücumlara hazırlıq görülməsini tələb edir.
"Bu gün cəbhədə sakitlik olmayıb, döyüşlər gedib. Biz bütün bunları qeydə almışıq. Görürük ki, Rusiya bu müharibəni bitirmək niyyətində deyil, təəssüf ki, biz yeni hücumlara hazırlaşırıq. Lakin sülh olmalıdır. Biz məhz bunun üçün çalışırıq – Ukraynanın müdafiəsi, Ukraynanın müstəqilliyi və insanlarımız üçün təhlükəsizlik ən vacib məsələlərdir", — deyə Zelenski vurğulayıb.
ABŞ-ın diqqəti və texnoloji dəyişikliklər
Ukrayna liderinin sözlərinə görə, ABŞ diplomatik proseslərdə iştirakını davam etdirsə də, hazırda Vaşinqtonun diqqəti daha çox Yaxın Şərqdəki vəziyyətə, xüsusilə İrandakı müharibəyə yönəlib.
Zelenski həmçinin qeyd edib ki, "Rusiya təcavüzü artıq hərbi sahədə qlobal dəyişikliklərə təsir göstərir və müharibə aparma texnologiyalarının inkişafını sürətləndirir".
Bizim.Media
