Bakı Metropolitenində hər gün minlərlə sərnişin daşınır. Günün müəyyən saatlarında sərnişin sıxlığının artması isə müxtəlif insidentlərin, o cümlədən qəfil səhhət problemləri, huş itirmə və xəsarət hallarının baş verməsi ehtimalını artırır. Belə vəziyyətlərdə ilkin tibbi yardımın vaxtında göstərilməsi xüsusi əhəmiyyət daşıyır.
Lakin diqqətçəkən məqam ondan ibarətdir ki, Bakı Metropoliteninə məxsus qatarlarda ilkin tibbi yardım çantaları mövcud deyil.
Maraqlıdır ki, əgər sərnişinlər arasında tez-tez sağlamlıq problemləri yaranırsa, nə üçün qatarlar ilk tibbi yardım çantaları ilə təchiz edilməyib?
“Bakı Metropoliteni” QSC-dən Bizim.Media-nın sorğusuna cavab olaraq bildirilib ki, Bakı Metropoliteninin yeraltı istismar şəraiti, o cümlədən tunellərdə təbii olaraq nəmişlik və rütubətin mövcud olması müəyyən tibbi vasitələrin saxlanması üçün tələb olunan şəraitin təmin edilməsini çətinləşdirə bilər:
“İlkin yardım çantalarının tərkibində olan vasitələrin istehsalçı tərəfindən müəyyən edilmiş saxlanma şərtlərinə uyğun qorunması və yararlılıq vəziyyətinə mütəmadi nəzarətin təmin edilməsi zəruridir. Bu səbəbdən, ilkin yardım çantaları vaqonlarda deyil, müvafiq saxlanma şəraiti və nəzarət imkanları təmin olunan stansiyalarda saxlanıla bilər. Lakin bu halda belə həmin vasitələrdən yalnız peşəkar tibb personalı istifadə edərək müvafiq yardımı göstərə bilər.
Qeyd edilən məsələlər yalnız Bakı metropoliteninin təhlükəsizlik qaydalarına ziddiyyət təşkil etməmək şərtilə müvafiq hüquqi normativ aktlar və aidiyyəti qurumların müvafiq əsaslandırılmış rəyi əsasında tətbiq edilə bilər”, - deyə qurumdan suallarımıza cavab olaraq qeyd edilib
Həmçinin açıqlamada sərnişinlərin səhhətində problem yarandığı halda metropolitan əməkdaşlarının gördükləri tədbirlər barədə məlumat verilib:
“”Bakı Metropoliteni” QSC sərnişinlərin təhlükəsizliyi və sağlamlığının qorunması istiqamətində bütün zəruri tədbirləri həyata keçirir. Qeyd edilməlidir ki, stansiya işçiləri tibb üzrə ixtisaslı kadr olmadıqları üçün bu vasitələrin sərnişinlərə müvafiq xidməti göstərməsi metropolitenin əsas fəaliyyət vəzifələrinə ziddir.
Sərnişinin səhhətində hər hansı problem yarandıqda, metropoliten əməkdaşları dərhal təcili tibbi yardım briqadasının çağırılması üçün aidiyyəti üzrə operativ tədbirlər görür. Bu mexanizm sayəsində həkim briqadası hadisə yerinə mümkün ən qısa müddətdə cəlb olunur. Həmçinin bildiririk ki, əməkdaşlar üçün ilkin yardım mövzusunda dövri təlimlər təşkil olunur. Təlimlərdə fövqəladə vəziyyətlərdə düzgün davranış qaydaları, ilkin yardımın əsas prinsipləri və sərnişinlərlə düzgün ünsiyyət bacarıqları öyrədilir.
Həmçinin aidiyyəti qurumlarla dövri əlaqəli fəaliyyət təmin edilir və müvafiq addımlar atılır. Bakı Metropoliteni sərnişinlərin təhlükəsiz və rahat daşınması üçün zəruri şəraitin yaradılması istiqamətində tədbirlərini davam etdirir.
Qeyd edilməlidir ki, Bakı Metropoliteninin fövqəladə hallar üzrə mövcud prosedurları hadisə baş verdikdə şəxsin ən yaxın stansiyaya çatdırılmasını və burada ona müvafiq yardımın təşkil edilməsini nəzərdə tutur”.
Nəzrin Mirzəyeva, Bizim.Media
