Gəncədə kütləvi dava: 1 ölü, 3 yaralı var

Gəncədə restoranlardan birinin qarşısında baş verən kütləvi dava bir nəfərin ölümü, üç nəfərin xəsarət alması ilə nəticələnib. 

Bizim.Media-nın yerli bürosunun məlumatına görə, hadisə şəhərin Poçt qəsəbəsində baş verib.

Yaranan mübahisə sonradan əlbəyaxa davaya çevrilib. Dava zamanı 1983-cü il təvəllüdlü Azər Yusifov kəsici-deşici alətlə bədənin daxilinə keçən xəsarətlər alıb və hadisə yerində dünyasını dəyişib.

Kütləvi dava zamanı daha üç nəfər - 1995-ci il təvəllüdlü Rahub Bayramlı, 1998-ci il təvəllüdlü Tural İlyasov və həmyaşıdı Azamat Peşerskiy də kəsici-deşici alətdən xəsarətlər alıblar. Yaralılar Gəncədə yerləşən xəstəxanalardan birinə çatdırılıblar. Hadisə yerinə hüquq-mühafizə orqanlarının əməkdaşları cəlb olunub.

Polis əməkdaşlarının keçirdiyi əməliyyat-axtarış tədbirləri nəticəsində hadisəni törətməkdə şübhəli bilinən şəxsin saxlandığı bildirilir.

Faktla bağlı Gəncə Şəhər Prokurorluğunda cinayət işi başlanılıb, araşdırmalar davam etdirilir.

Məqsəd Rəhimov, Bizim.Media, Qərb bürosu