Qondarma İttihamlarla həbs olunan hüquq müdafiəçisi və jurnalist Pərviz Həşimlinin vəkili Bəhruz Bayramov bu gün Milli Təhlükəsizlik Nazirliyinin təcridxanasında onunla görüşüb. Vəkilin Moderator.az-a bildirdiyinə görə, P. Həşimli bir aydır saxlanılmasına baxmayaraq heç bir istintaq hərəkətinin aparılmamasından gileylənib:
“Pərvizin bildirdiyinə görə, müstəntiqlər hələ də
heç bir istintaq hərəkəti aparmadığından o özünün girovluqda kimi hiss edir.
Pərviz bildirdi ki, nəhayət 4 yaşlı qızının şəklini ona çatdırmağa icazə
verdiklərindən o bu gün şəkli götürə bilib. Eyni zamanda qeydiyyatdan keçməsi
şərtilə ailəsiylə məktublaşmağa da icazə almaq mümkün olub. Pərvizin bir
narazılığı da ona təcridxanada oxumaq üçün kitabın verilməməsidir. Qəzetlərə
gəldikdə isə Pərvizə yalnız “Respublika” və “Xalq Qəzeti” verilir ki, o da bu
qəzetlər vasitəsilə informasiya ala bilmədiyindən şikayətçidir.”
