Türkiyənin Çanaqqala vilayətinin Bayramiç rayonunda yetişdirilən xüsusi bir meyvə yüksək gəliri ilə diqqət çəkir. Dünyada yalnız bu bölgəyə xas olan “Bayramiç Beyazı” adlı ağ nektarin həm dadı, həm də yüksək bazar dəyəri ilə fermerlərə ciddi qazanc gətirir.
Bizim.Media Türkiyə mediasına istinadən xəbər verir ki, Kazdağlarının ətəklərində yetişdirilən bu meyvə bölgənin özünəməxsus mikroiqliminin təsiri ilə formalaşıb. Tüksüz quruluşu, ağ və çəhrayı rəngi, özünəməxsus ətri ilə seçilən “Bayramiç Beyazı” ənənəvi meyvələrlə müqayisədə istehsalçıya daha çox gəlir qazandırır.
Kazdağlarının zəngin su ehtiyatları və əlverişli iqlimi meyvənin keyfiyyətinə müsbət təsir göstərir. Buna görə də məhsul bölgədə “yaşıl qızıl” adlandırılır. Son illərdə yüksək tələbat səbəbindən onun əkin sahələri də genişlənir.
“Bayramiç Beyazı” Türkiyənin Avropa İttifaqında coğrafi işarə ilə qorunan məhsullarından biridir. Məhsula xarici ölkələrdə də böyük maraq göstərilir.
Yığım dövründə nektarinlərin bir hissəsi birbaşa Avropa bazarlarına göndərilir və bu, bölgəyə həm gəlir, həm də əlavə məşğulluq imkanları qazandırır. (Metbuat.az)
Bizim.Media
