Zaqatalada ağır qəza: Xəsarət alanlar var – FOTO

Gecə saatlarında Yevlax-Zaqatala-Gürcüstan magistral yolunun Zaqatala şəhəri ərazisindən keçən hissəsində üç müxtəlif markalı avtomobilin iştirakı ilə yol qəzası qeydə alınıb. 

Bizim.Media-nın yerli bürosu xəbər verir ki,  belə ki, “Mercedes” markalı minik avtomobili sərnişin daşıyan “Mercedes-Vito”nu vurandan sonra qarşıdan gələn “BMW” markalı minik avtomobili  ilə toqquşub.

Hadisə şahidləri bildirirlər ki, “Mercedes” markalı minik avtomobilinin sürücüsü nəqliyyat vasitəsini sürətlə idarə edirmiş.

Qəza zamanı üç nəfər müxtəlif dərəcəli bədən xəsarətləri alaraq Zaqatala Rayon Mərkəzi Xəstəxanasına çatdırılıb.

İlkin tibbi yardım göstəriləndən sonra yaralılar xəstəxananın cərrahiyyə korpusuna yerləşdirilib. Hazırda yaralıların müayinəsi aparılır və şəxsiyyətləri dəqiqləşdirilir.

Faktla bağlı araşdırma başlanılıb. 

Tural Rasimoğlu, Bizim.Media, Şimal-Qərb bürosu