Putinin sevimli qrupunun üzvü vəfat etdi

Rusiyanın “Lyube” qrupunun bek-vokalisti Aleksey Tarasov 64 yaşında dünyasını dəyişib. Qrup Rusiya Prezidenti Vladimir Putinin sevimli musiqi kollektivlərindən biri kimi tanınır.

Bizim.Media xəbər verir ki, Rusiya KİV-lərinin məlumatına görə, musiqiçinin ölümünə son vaxtlar mübarizə apardığı onkoloji xəstəlik səbəb olub. Qrupun nümayəndələri də onun vəfat etdiyini təsdiqləyiblər.

Məlumata görə, bu ilin əvvəlində Tarasova qırtlaq xərçəngi, bir neçə ay sonra isə metastazlarla müşayiət olunan bağırsaq xərçəngi diaqnozu qoyulub. Son aylarda o, səhnəyə çıxmayıb və səhhəti barədə ictimaiyyətə açıqlama verməyib.

Tarasov 1989-cu ildə qrup yaradıldığı vaxtdan kollektivin üzvü olub və “Lyube”nin bütün studiya albomlarının yazılmasında iştirak edib.

Qrupun solisti Nikolay Rastorquyev isə Putinin etibarlı şəxsi kimi tanınır və onun siyasətini dəstəkləyir. O, Rusiyada Ukrayna ərazilərinin işğalına dəstək tədbirlərində və mitinq-konsertlərdə iştirak edib.

Bizim.Media