İrəvanda yeraltı keçid su altında qaldı - VİDEO

Sosial şəbəkələrdə Ermənistan paytaxtındakı "Dostluq" ("Barekamutyun") metro stansiyasının yaxınlığında yerləşən yeraltı piyada keçidinin su altında qalmasını əks etdirən görüntülər yayılıb. Videodan görünür ki, İrəvana yağan güclü leysan yağışları nəticəsində keçiddə suyun səviyyəsi demək olar ki, dizə qədər yüksəlib.

Bizim.Media xəbər verir ki, daxildə olan şəxslər — həm ticarət obyektlərinin satıcıları, həm də sıravi piyadalar suyun içində çarəsiz vəziyyətdə qalıblar.

Kadrlarda erməni dilində danışıqlar eşidilir: vətəndaşlar qısaqapanma və cərəyan vurma təhlükəsinin qarşısını almaq üçün bir-birlərini mağazaların işıqlarını dərhal söndürməyə çağırır, həmçinin təxliyə yollarını müzakirə edirlər.

Yerli sakinlər qeyd edirlər ki, bu yeraltı keçid ilk dəfə deyil ki, su altında qalır. Hər dəfə güclü yağıntılar zamanı şəhərin yağış suları sistemi axınların öhdəsindən gələ bilmir və infrastrukturu əsl gölə çevirir.

Sakinlərin və ticarət köşkləri sahiblərinin mütəmadi şikayətlərinə baxmayaraq, İrəvan şəhər rəhbərliyi tərəfindən problemin sistemli həlli hələ də tapılmayıb.


Bizim.Media