Pərəstişkarları üçün 3 qayda qoydu

Məşhur “Evdə tək” (“Home Alone”) filminin ulduzu Makoley Kalkin pərəstişkarlarının üç halda ona yaxınlaşmasının yolverilməz olduğunu açıqlayıb.

Bizim.Media xəbər verir ki, bu barədə New York Post nəşri məlumat yayıb.

45 yaşlı aktyor bunu iştirak etdiyi podkastlardan birində deyib. Onun sözlərinə görə, şəxsi sərhədlərə hörmət olunması vacibdir:

“Mən yemək yeyəndə mənə yaxınlaşmayın. Bu, xoşuma gəlmir. Uşaqlarımla olanda da yaxınlaşmayın”, — deyə Kalkin bildirib.
 

Aktyor ümumiyyətlə ailəsi ilə birlikdə olduğu vaxtlarda — həyat yoldaşı Brenda Sonq və 3 yaşlı Karson, 4 yaşlı Dakota adlı övladları ilə — ondan uzaq durmağı xahiş edib. Bundan başqa, Kalkin pərəstişkarların onun arxasınca tualetə qədər getməsinin də yolverilməz olduğunu vurğulayıb.

Onun sözlərinə görə, bu cür qaydaları müəyyənləşdirməyə səbəb ictimai tədbirlərdən kənarda pərəstişkarlarla tez-tez qarşılaşması və bu ünsiyyətin artıq tənzimlənməsinə ehtiyac yaranması olub.

Qeyd edək ki, rejissor Kris Kolambusun çəkdiyi “Evdə tək” filmi 1990-cı ildə ekranlara çıxıb və Ginnesin Rekordlar Kitabına bütün dövrlərin ən çox gəlir gətirən komediya filmi kimi düşüb.

Makoley Kalkin filmdə əsas obrazı — bayramqabağı evdə tək qalan Kevin Makkallister rolunu canlandırıb.

Bizim.Media