“Bazel”in atmacasına “Kayrat” şərik çıxdı, “Qarabağ” hər ikisini susdurdu - FOTO

Konfrans Liqasında “Qarabağ”la birgə H qrupunda yer alan İsveçrənin "Bazel" klubu “Instagram” səhifəsində Ağdam klubunun azarkeşləri ilə bağlı paylaşım edib.

Bizim.Media xəbər verir ki, İsveçrə təmsilçisi azərbaycanlı futbol azarkeşlərinin sosial şəbəkə hesablarındakı “rəy hücumu”ndan şikayətlənərək öz fanatlarını stadionda komandaya dəstək olmağa səsləyiblər. 

"Azərbaycanlıların şərhlərindən siz də bezmisiniz? Elə isə oyuna gəlib "Qarabağ"a qarşı komandamızı stadiondan dəstəkləyin", - deyə paylaşımda qeyd olunub.

Eyni qrupda yer alan Qazaxıstan "Kayrat"ının rəsmi səhifəsi bu fotoya "Bu hiss mənə tanışdır" şərhini yazıb. "Qarabağ"ın bu rəyə cavabı gecikməyib. Təmsilçimizin rəsmi səhifəsindən "Başqa nə hisslər keçirdin?" sualı ünvanlanıb.

Ağdam klubu digər rəyində “Bazel”i salamlayaraq, nəticədən asılı olmayaraq dostluğun hər zaman qazanacağını yazıb.

Qeyd edək ki, “Bazel” – “Qarabağ” oyunu dekabrın 9-da keçiriləcək. Hər iki komanda H qrupunda 11 xala malikdir və pley-offa vəsiqəni təmin edib. Ağdam təmsilçisi yalnız qələbə sayəsində qrup lideri ola və 1/8 finala yüksələ bilər.

Bizim.Media