Naxçıvan sakinlərinin su təminatı ilə bağlı narazılığına RƏSMİ CAVAB

Muxtar Respublikada içməli su problemi ilə bağlı şikayətlər davam edir. Naxçıvan şəhərinin Babək məhəlləsi sakinləri iddia edirlər ki, əraziyə verilən suyun qrafiki dözülməz hal alıb. Onların sözlərinə görə, iki gündən bir əsassız səbəblərlə su kəsilir.

Məsələ ilə bağlı Bizim.Media Naxçıvan şəhər Sukanal İdarəsinə müraciət edib. Qurumdan bildirilib ki, əhalinin içməli su ilə təminatı fasiləsiz şəkildə həyata keçirilir:

“Əhali 7/24 fasiləsiz içməli su ilə təmin olunur. Qəza halları istisna olmaqla, uzunmüddətli fasilələrə yol verilmir. Su təminatının davamlılığı üçün mütəmadi olaraq su xətlərinə baxış keçirilir, nasazlıqlar vaxtında aradan qaldırılır”.

Qurum sonuncu qəza halının avqustun 11-də Əliqulu Qəmküsar küçəsində qeydə alındığını bildirib:

“Həmin qəza səbəbindən Babək məhəlləsinin içməli su təminatında qısa müddətli fasilə yaranıb. Lakin gün ərzində problem aradan qaldırılıb və məhəllə su ilə təmin olunub”.

Aygün Hüseyn, Bizim.Media