Həbsxanalarda dünyaya gələn uşaqların sayı açıqlandı - RƏSMİ

2020-2024-cü illər ərzində cəzaçəkmə müəssisəsində cəza çəkən 30 qadın uşaq dünyaya gətirib.

Bu barədə Bizim.Media-nın sorğusuna cavab olaraq Ədliyyə Nazirliyindən məlumat verilib.

Bildirilib ki, həmin dövrdə doğuş zamanı ana ölümü, eləcə də doğuş zamanı uşaq ölümü qeydə alınmayıb:

“Cəzaçəkmə müəssisəsində cəza çəkən qadınların uşaqlarının doğumu yalnız TƏBİB-in tabeliyində olan doğum evlərində həyata keçirilir. Həmin uşaqların tibbi müayinələrinin aparılması, eləcə də onların peyvənd olunması kimi xidmətlər də TƏBİB-in tabeliyində olan dövlət tibb müəssisələri tərəfindən icra edilir”.

Qurumun məlumatında uşaqların 3 yaşına kimi ana ilə cəzaçəkmə müəssisəsində qala biləcəyi bildirilib:

“Onların bu hüquqları qanunvericiliklə tənzimlənir. Uşaq 3 yaşı tamam olanadək ana ilə qaldıqda cəzaçəkmə müəssisəsində bu məqsədlə ayrılmış uşaq evlərində saxlanılırlar. Uşaq evləri uşaqların normal inkişafı və yaşayışı üçün zəruri şəraitlə təmin edilir”.

Günay Şahmar, Bizim.Media