Azərbaycan əhalisinin banklarda nə qədər əmanəti var?

Azərbaycanda əhalinin banklardakı əmanətləri rekord səviyyəyə çatıb.

Bizim.Media xəbər verir ki, bu barədə Azərbaycan Mərkəzi Bankı məlumat yayıb.

Bildirilib ki, bu il yanvarın 1-nə əhalinin banklardakı əmanətləri 14 milyard 661.9 milyon manat təşkil edib ki, bu da indiyədək olan ən yüksək göstəricidir.

Əhalinin banklardakı əmanətləri əvvəlki ayla müqayisədə 3% və ya 426.3 milyon manat, son bir ildə isə 13.2% və ya 1 milyard 714.1 milyon manat artıb.

Qeyd edək ki, əhalinin banklardakı əmanətlərinin həcmi 2021-ci ildən etibarən davamlı artım tendensiyası nümayiş etdirir.

Xatırladaq ki, Beynəlxalq Valyuta Fondunun "Pul və Maliyyə Statistikası" metodologiyasına əsasən fərdi sahibkarlıqla məşğul olan fiziki şəxslərin əmanətləri də sözügedən əmanət həcminə daxil edilib.

Bizim.Media